Mmmmmúsica

Chégame a pelota por partida dobre para participar nesta lasciva iniciativa musical de casatlántica e sr. moderno que lle poría a pel de galiña á miña devota iaia Norimaki, dadas as sacras festividades que comezan. Aínda así, e con todos os respetos á miña avoa, este androide pecaminoso non vai ser tan descortés como para rexeitar a xugosa oferta blogueril.
O certo é que agora lamento máis que nunca non ter a man o magnífico "kilador-CD" que me regalara un Don Juan destes de manual hai uns anos nese breve tempo no que estiven no seu punto de mira (ata que lle presentei a unha impoñente sueca, tamén das de manual e como é lóxico tiveron que manualizarse os dous). Supoño que a estas alturas da iniciativa será imposible non repetirse, pero con CD ou sen el, aquí vos deixo a miña proposta kiladora.
Aviso: nalgúns temas as letras non son especialmente "propicias", pero nestes casos écheme igual. Outra cousa: dalgúns temas non hai videos propios pero o que importa é a canción non sí?

Ocorrénseme mil temas jazzísticos e a escolla faise difícil, pero nesta ocasión quedarei coa sensual voz de Nina Simone e o in crescendo do seu Feeling Good, que ben bastante ao caso ;)

Na liña dos clásicos calenturientos unha canción que non pode fallar é Fever, na versión de Peggy Lee, mesmamente.

Para sesións tremendamente pastelosas as melodías de Erik Satie aloumiñan os corpos por sí soas, mágoa dos videos, deixovos coa Gnossiene nº1. No seu defecto tamén vale con Yann Tiersen para esta caste de encontros.

Pero non todo vai ser piano, o rock e categorías alén tamén dan moito de sí. Opeth ten variedade, caña e relax, pero desta fico cos cellos de Apocalyptica, como non atopei video de Cohkka, queda o de Quutamo, que tampouco está mal para verlles batendo as guedellas e cambiar de tercio.


Para polvetes canallas, ninguén mellor que o grande Waits, aínda que se me ocorreron antes outros temas este Temptation dá moito xogo, ao fin e ao cabo de tentacións vai a cousa...

Nesa liña tamén gosto moito El Desierto de Lhasa, aínda que a canción sexa máis ben triste encántame esa voz desgarrada.

Os discos de Lamb teñen un bo feixe de temas susceptibles de ser empregados como bso dos encontros carnais, mesmo este co casto anxo Gabriel de prota.


Ía tentalo, pero estaría faltando á verdade se non deixo nada dos Massive Attack así que velaquí un tema para encontros con morbillo, Karmacoma (con Tricky).

E xa para rematar este top... ¿9? e como non podería ser doutro xeito considerando a miña condición de debuxo animado, un temazo para polvetes divertidos (e ideal para estriptis): o tema principal da Pantera Rosa.

E agora pásolle a pelota a ElSenhor, Torreira, Mística, FraVernero e Ra.