De ósculos e homos varios

"A min dúas rapasas dándolle paréseme estupendo, pero dous homes...sácateme de ahí!!!"

Isto de traballar con camioneiros dá moito xogo para crear polémica entre auténticos Homos Pectuslupus, que representan unha ampla porcentaxe da nosa sociedade. Non esquezamos outros homos, como o Homo Faber, o Homo Economicus, o Homo Ludens, The Homens ou mesmo o delicioso Hommos (do árabe: garabanzo).

Como ía dicindo, estes Homos Pectuslupus, ignorantes do pasado activamente bisexual dos seus antecesores, censuran o erotismo entre os XYs pero non entre as XX. Vamos, que Safo sí, pero Adriano non. A ver quen lles conta que nos exércitos gregos se promovía a homosexualidade entre os guerreiros para fomentar a camaradería e a implicación na loita e que ata o auxe do cristianismo, os romanos tamén se apuntaban a iso de darse aos placeres eróticos con quen cadrara, sen importar o xénero. Aínda que cómpre sinalar que esas dádivas efébicas lles estaban prohibidas ás mulleres.

E é que nisto do hedonismo os antigos sabíanche moito. Se os romanos tiñan tres verbas habituais para catalogar os tipo de bicos, por algo sería. Eu de etimoloxía ando moi verde, pero non me cadraba o paso de "osculum" a bico... e resulta que non é o mesmo... Seica osculum era o que se daba na cara, o de saúdo, como os que se dan os rusos. Logo está o basium que é o que se dá nos beizos, o que eu traduciría por pico e finalmente está o suavium que é o bico erótico vencellado á relación sexual, noutras palabras, morreo. Non sei en qué categoría entraría a imaxe... Por certo, quen queira debates profundos sobre o uso que lle daban ás verbas Catulo e Plauto, aquí ten máis.
Así que logo desta dose habitual de verborrea araliana e antes de rematar, aproveito para propoñer unha ollada ao pasado, un "Antigo Mediterráneo-Revisited" coas correcións pertinentes e as engadiduras que se lle vaian ocorrendo ao personal, iso sí, censuras e puritanismos relixiosos totalmente prohibidos.
E non, non se acepta cilicio como xoguete sexual.